茶餐廳食早餐之中，眼睇住報紙，A1講海峽對面一班勇敢而有禮嘅年輕人嘅抗爭；耳仔呢就聽住隔籬枱玩緊電話嘅嗰位5歲四眼仔，點樣同求佢飲水嘅阿媽抗爭！一個逼，一個避；一個鬧，一個嗌，抗爭睇嚟好快會進一步升級。
有點樣嘅上一代，就有點樣嘅下一代，勇敢嘅孩子背後總有個開明嘅家庭，但唔代表掛住打機嘅小朋友就係阿媽唔識教。有時開竅呢啲嘢，可能一句說話就夠，正所謂射門唔使多，中龍就入波。
「你咁樣轉來轉去，得嗰三分鐘熱度，肯定一事無成呀！」某年暑假參加田徑訓練班，由於之前嗰年練長跑練得太辛苦，第二年貪得意轉去玩跳高，諗住企多過跑會舒服啲，結果俾上年嘅長跑教練撞到，就換來一鼻子灰；當時我好唔順氣，但到今日跑步時，都會不期然諗起佢。
「細路，你同我記住，性格影響命運呀！」呢段訓話係要加埋好幾吓嘅啪啪聲，因為場景係自己企定定伸出右手，俾校長用間尺打緊手板。一邊忍痛一邊心諗，咩性格咩命運吖，今鋪俾你捉到就我冇運啦；但今時今日我用咗呢6個字嚟做網名，闖蕩江湖。
「家陣唔係話邊個差過你，定係你叻過邊個同學，而係你自己最擅長嘅究竟係邊樣，你知唔知呀？」話說體育阿sir宣佈緊邊個同學參加邊個校際賽嘅項目，我見自己跑得快過參加400米嗰位同學，就想同阿sir認叻轉項唔跑辛苦好多嘅1,500米；結果換嚟阿sir兜口兜面嘅貓麵，我先知原來贏人不如贏自己。
「太太，我哋與其諗住開間幼稚園，不如開一間大專啦，畀多啲機會讀唔到大學嘅年輕人吖！」呢句唔係同我講嘅，係好年前喺樹仁校刊睇到；原來之所以有樹仁學院，全靠校監胡鴻烈向校長鍾期榮嘅呢句建議。一句說話，可以改變一個人，甚至一班人。鍾校長，永遠懷念你。
KEYMAN
now TV主持