2013/14年度嘅打吡大賽在三月十六日圓滿結束，結果不出所料，冇冷爆，大熱門、次熱門順利勝出，連贏位只派二十一元五角，中咗都係得啖笑。左丁山當日在本欄所俾嘅貼士係中晒，但投注銀碼大，中晒都要蝕本，笑住嚟蝕，荷包受損，要留意嘅係，打吡冠軍威爾頓（獎金928萬元），以後平磅跑二千米以上大賽，可以贏晒。亞軍「步步友」（獎金352萬元）跑千二至千六米，可目無餘子。至於季軍信利多（獎金160萬元）只輸一個馬位多啲，但拋離第四名近六個馬位，以後唔憂冇馬贏。
一年一度打吡大賽，就係冠軍科技大股東簡文樂請客之期，佢隻馬「先見之明」在1996年爆冷，力壓邢李㷧隻「百看不厭」，奪得打吡，令當時盛裝而至，一心捧盃嘅林青霞非常失望，「百看不厭」嘅英文名字就是Michael's Choice，米高係邢李㷧嘅英文名，那些年，人人都知道係乜嘢意思，米高的選擇咪就係林青霞囉，中文名改做「百看不厭」係甚麼意思，你懂的！
簡文樂贏過打吡之後，每年在打吡賽日包下沙田馬會會所六樓請客，人氣鼎盛，除相熟朋友外，還有外國領事，左丁山見到張宇人議員在座，即刻同佢握手：「祝你今日捧盃！」張議員笑騎騎咁話：「唔敢話贏梗！」簡兄係匈牙利駐港領事館榮譽領事，呢日嘅馬會自助餐特別有匈牙利國寶級豬肉及豬肉腸款待嘉賓，人人吃過，讚不絕口，不知街上在那裏可以買得到而已。吃飽之後，大家專心賽馬，適逢馬會主席施文信與行政總裁應家柏特登從董事廂房走過嚟打招呼及拍照，左丁山乘機問EB：「打吡會唔會爆冷？」佢斬釘截鐵咁話：「唔會，2號Win，拖1號單Q」，果然權威噃，後來賽果就是如此，馬主鄭強輝與好友張宇人上頒獎台，笑到見牙唔見眼，跟住坐寶馬開篷車在草地慢駛，接受馬迷歡呼，做馬主如此，夫復何求。
簡文樂對沉香木好有研究，水平係專家級，呢日睇到新聞話有賊人偷香港沉香樹斬木，估計總值十億元咁多。左丁山醒起有一次食午飯時，簡兄講沉香，佢話沉香樹愈老愈有價值，香港嘅沉香論年齡，只係BB嬰兒級，根本無甚大用，偷盜之，枉費心機也。