【本報訊】港人去台灣踏單車環島幾成潮流，他卻選擇以腳代車。27天旅程，見識過寶島地震、遇過寒流，日跑40公里，幾乎每日跑一趟「全馬」，「有啲嘢𠵱家唔做，一世都唔會做」。曾幾何時，他和你我一樣，為了心中認定的鐵飯碗，寸步難行，「36歲，係一個關」。走過這個關，但見花蓮太平洋海岸線上的一片藍，他是鐵人教練潘永成。
記者：呂麗嬋
內地愛壯行，台灣愛尋夢，以壯行方式尋夢的，是「香港仔」潘永成。上月，他自寶島回港，成為首個完成環台跑的香港人。「由高雄小港機場出發，每日早上8點前開始跑，跑6至8個鐘，最長試過一日跑咗57公里。」由高雄跑到花蓮，由花蓮跑到台中，看過一望無際的蔚藍海岸線，經過擁擠的台北，回到起點，1,000公里的路程，原定跑30天，他27天就跑完。
「好多嘢，未做之前好多顧慮，到真係做，反而冇想像咁難」。出發前，他先到五金舖度身訂做「戰車」，將手拉扶把加長，方便邊跑邊拉；又開設面書專頁，每日更新「環台跑日程」，「唔同毅行者，我冇支援隊，一個人上路，但每次喺網頁更新近況，都有朋友留言鼓勵，呢啲都係好大嘅動力，好似一班人陪我一齊完成一件事，一啲都唔孤單。」他說。
「台灣人好熱情，好多司機專登兜路停車，只為攞樽水畀我；有啲人又會喺對面馬路嗌過嚟，為我打氣加油」。跑到腳底佈滿水泡，試過在宜蘭遇上寒流，差點病倒；出發僅五天，已在台東民宿遇上地震，叫他飽吃驚風散，「半夜3點，矇矇矓矓，覺得張床喺度搖，到4點幾，又震多次」。地震叫他徹夜難眠，又試過在台東蘇花公路，迷失在濃霧之中，就像他的人生。
「36歲，對我嚟講，係一個關口」。1998年大專畢業，性格穩陣的他，主修實用性強的物流，畢業後先後做過地鐵和機場控制中心，「呢啲公營機構，係好多人眼中嘅鐵飯碗，大公司，福利好，連搭車都唔使錢」。有一份穩定的工作，但自小熱愛運動的他，卻夢想當個全職運動員，「嗰時返工係返工，一放工就去跑步，好多時帶埋波衫，喺機場放工，立即坐車去荔景，再跑返去黃大仙，雖然慢過搭車少少，但可以慳時間，唔使去球場再操」。
做跑步教練 推廣全民運動
天天跑一次馬拉松，樂此不倦，2004年狀態最巔峯，參加澳門馬拉松，全馬跑出2小時38分的上佳時間，位列華人第一。「嗰時好想贏，有鬥心，諗過轉做全職運動員」。只是，成年人，要生活，都懂得計算，「唔係李嘉誠，好多現實顧慮」。直至兩年前，他36歲，索然無味的工作，自覺不再年輕，都說運動員要挑戰自己，他問自己：我有勇氣改變，離開生活多年的安全區嗎？
「我唔想再畀自己後悔多一次」。沒有轉做全職運動員，成為無法逆轉的人生遺憾，36歲那年，他對自己許下諾言：追回失去的時間，「我今年38，運動員嘅黃金時間已過，但我仍然可以做教練，訓練其他同我一樣喜歡跑步嘅年輕人」。成立非牟利團體「weSport」，在民間推廣全民運動，「以前為時間而跑，𠲖家學識跑慢少少，享受沿途嘅風景」。
裸辭尋夢需要勇氣，收入大不如前，正是尋夢的代價，但他相信已找到人生的第二春。一個人的馬拉松，沒有獎盃，仍跑得起勁，「至少，贏咗自己。」他笑着說。