周四上演嘅NBA常規賽，「超人」懷特侯活雖然繼續高掛免戰牌，但火箭主場仍然輕鬆炒木狼129:106，繼續為季後賽做準備。其中林書豪就造出雙雙，一洗頹風。
錄生涯1,001個助攻
火箭對木狼，其實睇牌面都已經高下立見，點知班球員可能太輕敵，第1節俾木狼入成33分，到第2節仲一度落後到10分，教練麥希梗係嬲爆，即刻叫咗暫停，省到班球員立立令。火箭班球員都算知恥近乎勇，完咗暫停後即刻連入17分，單計成個第2節仲淨贏對手16分㖭。麥希賽後話：「我哋打得好差，所以我話吓班球員，而佢哋好在都即時做番啲嘢。」
今場有30分鐘嘅上陣時間，令到林瘋有足夠時間熱好身，打番場爭氣波。而繼續趁侯活養傷而正選落場嘅阿斯克今場都交足功課，仲同林瘋狂打pick & roll，令到後者即刻生晒，成功造出個人今季第3次雙雙。林瘋今場交出10次助攻，令到自己職業生涯嘅助攻總數破千，有1,001個咁多。
火箭贏到波其實好正路，不過除咗火箭，木狼亦都彈出個勁爆新仔迪安。迪安上兩場都已經攞到雙雙，今場繼續當旺，威水到交出22分同21籃板，有機挑戰新人王寶座喎。