泡菜國近年嚟真係國運昌隆，一班泡菜仔喺中港台紅到七彩，當中「獸仔」間經理人公司真係見錢開眼，只要邊度畀得起錢就會去邊度，唔理係乜鬼活動都去。講開泡菜藝人，關仁諗起「夠雷」都好識搵錢。
「攞番去阻碇」
之前夠雷喺香港做活動，有唔少粉絲到場支持佢，當日佢收咗唔少禮物，臨上飛機時佢喺酒店房拆禮物，有唔少粉絲摺咗好多幸運星，裝喺玻璃樽度送畀佢，有啲闊太粉絲就送名牌包包畀佢，佢見到係名牌包包就即刻收埋入篋，然後助手問佢啲幸運星、毛毛公仔要唔要入篋，佢就話：「送埋呢啲冇乜用？禮物畀我做乜，攞番去阻碇咩！唔要喇！」結果啲助手就要咗啲公仔，幾樽充滿愛心嘅幸運星就留低喺酒店房，如果粉絲見到，肯定傷心死。
撰文：關仁