最近美國政治劇《紙牌屋》（House of Cards）不僅以美中外交黑幕為主線，更影射中共太子黨，尺度之大令中國劇迷譁然，第二季同步喺中國視頻都同步播出，亦令觀衆聯想到薄熙來，題材敏感，但暫時未被刪剪。之不過依家有得睇，唔代表之後都有喎…。
根據《The Hollywood Reporter》報道，內地網站監察部門最新規定，可能會要求對視頻網站，即係好似土豆、風行網、優酷、樂視、愛奇藝、騰訊等等播出嘅內容進行審核，各地都會設置「審核部門」，並持有「審核執照」。被「審核」嘅除咗包括歐美劇，仲包括視頻網站自製嘅網路劇同微電影播出，加強監管，「篩選」到乾乾淨淨先至俾大家睇。即係好似當年《金枝慾孽》咁，被指含政治寓意，強國監控部門馬上勒令封殺，結果一夜之間殺得乾乾淨淨，seed都冇埋。
新例一出，如果擅自播出未經過審批嘅視頻網站，會被警告、罰款同埋禁止經營視頻媒體五年嘅處分。
如果真係會加強審核的話，首當其衝，唔止強國網民，仲包括好多用緊高清網絡機頂盒——好似「小米盒子」之類嘅香港網民。一旦內地禁咗播，咁到時咪得物無所用，「越獄」都嘥氣。