加里夫巴利今季以1億歐元身價嚟到皇家馬德里，面對咁大嘅壓力，都算交足功課。可能有人吹毛求疵，用C朗嘅表現作為1億歐元嘅標準，從而得到巴利唔抵嘅結論。
首先，巴利冇C朗咁多入波，係因為佢冇咁多起腳機會，同能力無關，背後關係到球隊戰術同射門權分配。喺皇馬陣中，C朗毫無疑問得到無限射門權，因為佢係球隊嘅大佬；而巴利嘅角色係阿二，首要嘅工作係幫C朗拉開空位，造波畀C朗射。C朗今季場均7.6次射門，而巴利只係得2.9次。喺戰術之下，巴利惟有犧牲吓，去成全球隊同C朗。
既然有C朗，仲買多個巴利，仲搞到巴利發揮唔到百分百水平，咁皇馬仲唔係水魚？我哋先要明白，買巴利嘅目的係咩？唔係真正取代C朗，而係幫C朗搵個副手，當C朗缺陣時，有個同C朗級數接近嘅人，做到C朗平時做嘅嘢。因此，睇巴利對唔對辦，最緊要睇C朗缺陣嘅比賽時，巴利發揮得好唔好。C朗今季主要喺兩段時間缺過陣，先喺11月底傷過，同埋喺2月頭停賽。喺11月底嘅西甲對艾美利亞嘅下半場初段，C朗受傷離場，巴利都有入波，幫球隊大勝；C朗養傷，皇馬之後兩場對加拉塔沙雷同華拉度列，巴利合共射入4球。到2月頭嘅3場聯賽，C朗要停賽，巴利喺呢3場入兩球同埋有兩次助攻，幫球隊取得聯賽3連勝。
C朗喺度做細佬；C朗唔喺度做大佬。巴利好波得嚟又聽話，絕對物有所值。至於尼馬就冇位寫，有機會再講。
文：咖喱