周二正式成為紐約人總裁之後，積遜（Phil Jackson）喺周三對溜馬嘅NBA常規賽，首次現身麥迪遜花園球場。可能新官上任好腳頭，紐約人對住東岸1哥溜馬都未驚過，靠安東尼入34分，以92:86奏捷，用一場好波加埋7連勝嚟歡迎禪師。
話晒周三係首次回歸紐約人麥迪遜花園，全場觀眾企晒起身拍掌歡迎積遜，而後者都賣口乖話班球迷嘅反應，令到佢想落場打波㖭！據講，積遜喺比賽當日先同教練活臣斟咗一陣，內容就冇公開，不過相信禪師係向活臣教路，研究吓點樣贏溜馬。到咗開波前，積遜就正式同一班球員見面，寒暄咗幾句，仲叫佢哋專心比賽。聽到老細咁講，紐約人班球員梗係醒醒定定，為前途同錢途搏老命啦。
瘀血搏老命驚被裁
孭飛嘅安東尼繼續有好表現，連兩大瘀血A史杜達米亞同真達拿都大打爭氣波，最終成功幫紐約人贏波，為積遜入主贈興。連沉寂多時嘅A米都神勇射入21分，真達拿又狂搶14個籃板，睇嚟禪師揸旗真係唔同啲。
對於積遜喺記招話自己係紐約人未來嘅重要成員，安東尼就好行咁回應，話好榮幸積遜咁睇重自己，仲話從來冇講過想離開紐約㖭。雖然佢好興奮可以同禪師合作，但好似都仲未表明打完今季會唔會走喎。
紐約人近排遇神殺神，但要打入季後賽依然唔樂觀，活臣要喺今季後保住教練位亦好難。
活臣話識打三角
有記者問活臣，如果積遜要求佢下季用前者嘅拿手絕活三角戰術嗰陣會點，活臣就落足鞋油話冇問題，不過有「三角戰術大師」積遜幫手教就最好。
紐約人上下似乎都對積遜入主好正面，但聯盟高層就唔多高興。眾所周知，積遜未婚妻係湖人總裁珍妮畢斯，𠵱家積遜自己做埋紐約人總裁，利益衝突在所難免。NBA發言人話要訂立界線，確保呢段關係唔會影響兩隊內部運作。珍妮畢斯就澄清，自己冇份參與湖人籃球部嘅決定，所以唔會有任何衝突，同埋之前同NBA新任總裁施華食飯嗰陣，都已經傾過呢件事。
場外嘅政治問題，球員冇權話事；不過，想搭季後賽尾班車，佢哋都仲有希望嘅；排緊東岸第9嘅紐約人（見附表），如果繼續生性贏波，趕過鷹隊甚至前一位嘅山貓，都不是夢。
