王維基揸弗嘅香港電視開台連翻遭遇波折，旗下藝人前路茫茫，佢哋都開始另謀出路，嘗試轉型求生。早前決定5月底約滿唔續約無綫嘅李思欣，一心諗住回復自由身投身其他電視台，照咁情況睇，佢投奔港視無望，惟有再從長計議。思欣老公范振鋒一向有投資搞餐廳，佢非常鼓勵老婆從商，據知最近仲打本6位數字畀思欣入股友人喺銅鑼灣食肆紅館，畀佢過老闆娘癮。
進軍飲食界
馮仁昭噚日打畀思欣，佢話：「呢排得閒咪學吓老公咁做生意，我係小股東啫，食肆有三層，除咗主打火鍋同雞煲，樓下仲有日本料理。」思欣話始終最鍾意都係演戲：「港視開唔到台好可惜，其實藝人好對整個行業都好。」下月佢會幫新城開咪做節目，試吓做DJ。
思欣進軍飲食界，不獲續約嘅港視藝人黃澤鋒同林熹瞳都分別有後着，黃澤鋒日前話：「我本月中已經滿約，奈何公司遇到咁嘅情況，都冇辦法。我咪繼續做番飲食、做顧問、做舞台劇。我唔想離開呢個行業，時勢唔容許，我咪忍耐囉。」下月底約滿嘅林熹瞳就話有寫開劇本，收入都冇問題。
撰文：馮仁昭