中央打完泛民幾棍後伸出橄欖枝，安排全體議員訪滬傾政改，但反應似乎唔多熱烈，繼白鴿黨主席劉慧卿話一日冇證一日唔北上，人力兩名成員陳志全同陳偉業噚日亦話，如果要傾政改，唔該正式喺香港成立工作小組傾，唔好巧立名目北上。由於名不正、言不順，佢哋宣佈杯葛上海行。香港本土兩名成員包括新同盟范國威同公民黨毛孟靜，今日亦會同街工梁耀忠開聯合記者會，佢哋認為喺港人治港、高度自治下，唔應該北上傾政改，亦同人力一樣唔隨團。至於立法會秘書處就有上海行嘅初步安排，議員暫定4月11日周五開完內會後出發，13號傍晚坐飛機返香港。