政改諮詢倒數一個月多啲，政改三人組成員之一嘅政制及內地事務局局長譚志源Raymond，噚日殺入中學舉行首場學校政改座談會。為咗軟銷政改，佢出盡九牛二虎之力搞爛gag騷；唔知博唔博到學生撐政府方案，但呢場棟篤笑至少博到唔少學生一笑。
學生撐金秀賢做特首
Raymond一開波就問全場近800名學生，睇完政改三人組宣傳短片後，片中邊個最靚仔？當一名同學企起身大嗌：「你（譚志源）囉！」後，Raymond即刻叫助手送上政改宣傳紀念品，帶起全場氣氛。之後佢喺台上發言時，大抽明星兼《星星》嘅水，先後讀出劉德華、陳奕迅、G.E.M.同韓星金秀賢個名，叫學生舉手表態支持邊個做2017年特首，反而表明想連任嘅狼振英，就冇份畀學生揀囉。
八方現場所見，G.E.M.同金秀賢最受學生歡迎，全場歡呼以示支持，點知Raymond即刻話喎，雖則G.E.M.同金秀賢咁多人like，但G.E.M.喺2017年仲未夠40歲，金秀賢又「來自星星」、唔係本港永久性居民，所以唔合資格，成功博得唔少同學笑聲。
講到特首條件，Raymond話要四得而唔係四德，即係睇得、打得、講得同做得，全場又笑爆嘴，睇嚟佢轉行做棟篤笑都會幾得。
mailto:[email protected]