自閹對無綫嚟講，完全係等閒事！有網民發現，喺無綫高清翡翠台播放、購自台灣公視嘅飲食節目《台灣食堂》，播咗第一集後，竟然跳咗第二集改播第三集，原因相信同第二集內容有關。第二集介紹台灣眷村食物，除咗訪問唔少國民黨軍人同政府職員，又有眷村村民大唱國民軍軍歌嘅場面，甚至影住一間掛滿台灣青天白日滿地紅旗食店嘅「國旗屋」。嘩，一見呢啲旗，無綫點會夠膽播吖！有網民相信，無綫因政治敏感而抽起呢一集，無綫冇回覆《蘋果》，但回應《主場新聞》時就話：「由於拷貝問題，需時處理，有關一集將會延後播出。」
