上月曼聯前鋒朗尼續約，獲英超最頂薪30萬鎊，原來比起簡東拿92年由列斯聯加盟獲1萬鎊周薪合約，英超頂薪22年間暴升咗30倍。其實打開報紙經濟版，或者睇睇電視財經節目，經常出現嘅字眼就有咩量化寬鬆，咩振興經濟計劃等等，說穿了就係等貨幣進一步貶值。正如皇馬同巴塞花咗過億歐元，先後收購加里夫巴利及尼馬，全世界球迷睇到嘩嘩聲，難保幾年後1億歐元只夠英冠球隊買一個英格蘭小國腳。
落到球場，無論你轉會費1蚊定1億，都係一對腳一對手，撇開背後嘅身價，巴利同尼馬嘅轉會暫時都唔算得上成功。佩服皇馬教練肥安，去親邊隊都有基本成績，又唔會得失班主場球迷；好似帶皇馬，不單止進攻比摩連奴時期仲勁，比起寸王銳意改革嘅防線，肥安竟然更勝一籌。肥安到皇馬後嚟一個變招，改踢4-3-3陣式，滿足到C朗同巴利一對貴價雙翼齊飛嘅出場條件，但巴利死左腳嘅問題都幾大，西班牙其他球隊後衞係就係慢過佢，但唔難回身追番，巴利除咗幾腳勁射，其實加盟以嚟都活喺C朗陰影下。C朗之前停賽幾場，巴利又唔見得擔起大旗，冇晒熱刺時期以一己之力扭轉戰局嘅威力。
尼馬情況更慘，轉會風波搞到西班牙政府介入，會長羅素下台。巴塞之後補交稅款，加埋身價先過億歐元，但當中有幾大部份落咗尼馬父子袋，隊友唔葡萄就假。雖然巴塞聲稱收購尼馬後仲大把錢，球隊又冇負債等等，但有幾多貨大家心知，VV、佩奧爾等落實離隊，柏度洛迪古斯、馬斯真蘭奴等都傳想走，同巴塞莫財有啲關係；一個尼馬嚟到，搞到班波散晒，又點會值錢。
文：牽牛