本港市場越來越多唔同生意類別嘅公司上市，繼墓園股、夜場股、拍賣股，遲吓可能仲有隻打邊爐股。《彭博》噚日引述消息人士報道，指內地火鍋連鎖店呷哺呷哺餐飲管理（Xia Bu）計劃今年第二季來港上市集資23.4億元。
照字面讀，呷哺呷哺應該係日式火鍋Shabu Shabu嘅諧音。根據公司網站資料，呢間火鍋店似係針對年輕人市場，以新式火鍋做賣點。公司早於1998年喺北京創立，𠵱家喺內地北部同東部地區有近400間直營店。
呷哺呷哺早幾年已經引入投資者，2008年底私募基金Actis LLP以5,000萬美元買入公司多數股權，2012年底，另一個基金General Atlantic就從Actis手上買入呷哺呷哺股權。有基金股東持股，上市都係遲早嘅事。