中移動（941）業績差，遇上聯儲局提出加息時間表，完美震散港股，恒指失守2月初低位，短期落兩萬絕不意外。昨出席民企飯局，老闆分析指阿爺今次改革的大方向是要求企業由谷增長轉為改善經營質素，為減少信貸擴張，收緊銀根估計將會持續，當中美一齊收水，處身夾縫中的港股，痛苦可想而知。
市況不就，戰友切忌輕率出手撈底，胡亂接刀只會浪費子彈。呢個時候，最多只能打「901」守勢波，以極少注碼打游擊，中唔中都即日計數，以免資金被綁。
目前於股海搵食，最有把握應是睇業績揀股。精電（710）去年純利增42%至2.43億元，毛利率升5個百分點至26%，睇頭十足。業績亮點是：1）產能增加，下半年盈利較上半年勁升41%至1.42億元。2）全年派息每股50仙，按年升79%；派息比率67%，較前年53%高，現金流強勁。現價8.34元計，息率達6厘。3）TFT屏幕業務去年入量產期，今年續有新項目量產，令集團多個新增長引擎。
以下半年盈利為基準，保守假設今年增長一成，全年將賺3.12億元，按年增長29%，仍屬高增長，預測PE為8.7倍，甚為吸引，以11倍PE為目標，料可突破10蚊關。
魏力
http://www.facebook.com/2012ja