馬來西亞MH370班機失蹤一事，引起全球注視，CNN因全力報導，發揮24小時新聞報導的本色和優勢──據報在美國收視率大升近84%，怪不得CNN嘅死對頭霍士新聞即刻急起直追，連晚間清談節目（奧拉利等）都大講馬航班機失蹤。上星期六早上在家嘆報紙，開住CNN，有連續兩小時特輯講MH370，請來各方面專家，如退休機師、前情報局人員、飛機失事救災專家、失事調查專家、工程專家、航空雜誌編輯等等，再加吉隆坡通訊員，人地電視台可動員／接觸人才之多，我地香港傳媒真係望塵莫及，內地有句口號話：「做人不要太CNN」，其實如果改為「做人要CNN」，更為貼合實況。中國人有153名在機上，至今下落不明，恐怕已遭不測，按道理中國政府、中國傳媒應該最為關心，用盡心機去追訪新聞至係。美國乘客好似只有兩三位啫，睇吓人地美國新聞報導得幾落力，中國以及中國人傳媒事實上係望塵莫及！二十年前已有人發出豪言壯語話要建立一個華人CNN網絡，對抗美國新聞霸權，真係笑話，中國一日不容許新聞自由，全世界中國人仍要睇CNN，受「美帝國主義」影響。
點解美國媒體有咁多材料，全球率先報導MH370在暹羅灣轉向西飛，進入孟加拉灣？最大可能性就係美國調查人員放風。據INYT講，凡有飛機失事，飛機公司所在國家（例如馬航在馬來西亞）主導統籌一切調查，飛機製造商所在國（例如波音在美國）會派出專家隊伍協助，意外發生所在地（如最初以為係越南）政府義不容辭要救人，也參與調查，而機上乘客所屬國家為了人道理由，可派人參加，在馬航MH370個案，馬來西亞、美國、越南、中國就最落力啦。點知馬來西亞政府十分無能，毫無應變能力，被國際傳媒追訪到亂作一團，美國專家隊為了政治理由（即俾面主人家），最初保持低調，但過咗幾日，見唔對路，就索性向傳媒放料施壓，馬來西亞政府先至肯宣佈飛機轉咗去孟加拉灣，死死氣將雷達探測嘅原始數據（raw data）交俾美國人去分析。事實證明，如陶傑所斷言，亞洲人不能不倚賴美國，無美國不行。