正當本港藍籌業績蜂擁而至，國際級服裝品牌都公佈去年成績表，同港股一樣，冇眼睇！逾百年的英國品牌Mulberry，CEO要為業績、上任以來所下跌68%的股價負上全責，下台去；受累於國際滙市波動，Zara母企全球最大的時裝零售商Inditex，出現五年來最慢的增長，純利增幅少於1%達23.8億歐元；最開心的睇怕都係一眾名媛最愛的Hermès，憑着一袋難求，同有咁貴賣得咁賣的特色下，全年多賺7%達7.9億歐元，仲增加派息㖭。
不過唔係都好似Hermès咁襟撈，好似百年歷史的Chanel都俾人爬頭，有外國雜誌公佈去年香水市場的購買率，Dior的J'adore穩佔首位，Guerlain的little black dress以營業額增長25%的速度，從後趕上，向來穩佔皇座的Chanel N°5最終三甲不入。而Guerlain CEO一語點出致勝關鍵，最重要是夠後生、夠親民。睇嚟要生存一係紓尊降貴，一係門檻高到要平民買唔到為止。
過去Chanel N°5造就不少經典，由性感女神瑪莉蓮夢露所鍾愛Chanel N°5，到型佬畢彼特的「豆腐火腩飯」，潮人Mani近排更愛將呢支經典香水樽，化身成手機殼拎出街show off，就知仍有叫座力，只欠如何擺脫老氣的形象，重新搭上這架高速增長的列車，話晒有調查指，到2019年香水這行業全球利潤會超過1,217億元。
Samantha
本欄逢周一、三、五刊出