申訴專員黎年離任在即，噚日最後一次主持記者會，表現一貫淡定，唔覺有離愁別緒。佢話自己鍾意主動調查，最開心係改變到某啲政府部門嘅運作方式。佢提醒公務員，特別係高層，唔應該一味護短，要以開放態度面對批評，諗清楚人哋有冇道理先。佢仲話，市民期望越嚟越高，以前做落係咁又冇人投訴，唔代表冇做錯，要因應時代改變，諗吓點樣做好啲，因為公務員肩負令香港繁榮穩定、唔受政治爭拗影響嘅重任。至於接班人劉燕卿，一直俾人質疑經驗唔夠，黎年就力撐，話專員唔一定有特定背景先做得，相信劉燕卿會將以往工作經驗帶到新崗位咁話。