今日球壇焦點，肯定落在今晚7時開始的歐聯抽籤上面。鏖戰一輪，英超叫做有兩支球隊殺入8強，不過相比西甲盛世，或拜仁的大超班，甚至是PSG的舉重若輕，俱有不如，想見到英超球隊季尾能於賓菲加球場高舉大耳神盃，太難了。
話雖如此，歐聯對莫耶斯來說，卻成了及時雨，主場大勝奧林比亞高斯後，即大大聲話有信心贏冠軍，最少此刻可稍減董事局及球迷對他的「仇恨」。周六夜場作客韋斯咸，曼聯缺尹佩斯下，加上有下周中曼市打吡後顧，讓半/一不值捧，信韋斯咸下盤頂住紅魔。另一心水是大勇的紅軍作客卡迪夫城，穩開[半大]。
一場好波不等於反底，始終莫耶斯的戰術修為見底，贏奧軍不過是贏球員質素，回到熟路的英超難有着數。曼聯前幾季雖不乏大炒韋斯咸的賽績，經典之作當然是2011年球季作客一役，半場落後兩球下，靠朗尼連中三元反勝4:2。
缺維迪尹佩斯難逞強
時移世易，今日費Sir已去，單靠兩邊傳中的單調戰術，想威脅韋斯咸一對身高逾6呎3的中堅占士哥連斯和湯堅斯，恐非易事；反觀安祖卡路爾擅長高空攻勢，紅魔在隊長尼曼查維迪停賽，迪基亞應付傳中高波又拙劣，加上尹佩斯因傷缺陣，紅魔無論攻守與槌仔幫相比都落下風。
莫耶斯今季成眾矢之的，一舉一動都被傳媒於放大鏡下細看，動輒得咎，壓力甚大，就算口講要贏歐聯冠軍，有幾多成把握他心中有數；反而下周中迎戰曼城一仗，若順利報捷，或會成了他的續命符，起碼有望教到季尾才好好睇睇自行執包袱走人。有此後顧，紅魔上下有幾多心力放在今仗，可想而知。再者，就算昔日在槌仔幫身上有過不少愉快經驗，不過上季在英足盃及英超，紅魔作客去到烏普頓公園，都只能打成2:2平手，今周在前後場俱有主力缺陣，不宜高估，主場已3連勝的槌仔幫下盤是今周重心。
利物浦客場利[半大]
至於利物浦挾大勝紅魔餘威，今周作客卡迪夫城，以球隊的鋒力及戰意，勝望壓一，貼「客勝」，不如貼逾2倍的[半大]更好，畢竟利記15場客仗中，有10場是半場開「大」，而且下周中尚要迎戰新特蘭，料想速戰速決，所以[半大]更值博。
今周還有重頭大戰：包括英超的倫敦打吡車路士對阿仙奴，以及西甲的國家打吡皇馬對巴塞，兩場波初步傾向上盤，但大戰難測，還是專心睇波好過，決定不放上貼士欄。
文：仙道彬