意甲真係冇十幾廿年前咁好睇，仲係喺歐洲4大聯賽排包尾，隨時俾法甲爬過頭，但一個女人可能幫佢哋搶番啲收視。事關有個叫伊蓮娜譚比妮（圖）嘅女模特兒，遲吓或會吹意甲比賽；一場波有索女睇，啲麻甩仔球迷包括我求大俠在內，梗係會捧場啦！
8、90年代嘅意甲星光熠熠，例如有柏天尼、馬勒當拿、尹巴士頓、馬圖斯、巴迪斯圖達、巴治奧、韋亞、馬甸尼、施丹同埋舒夫真高等等，球星多到10隻手指都數唔晒。但家陣嘅意甲好淪落，球星走晒，入場球迷又少，而且又多假波；咁都未算，仲衰到連班霸AC米蘭都變埋陪跑分子。想留住粉絲啲眼睛，惟有搵囡囡幫手，但大家咪誤會，意甲未去到咁cheap，搵班索女喺場邊跳艷舞，只係會引入靚女球證執法啫。
兼職model變女哥連拿
現年25歲嘅伊蓮娜係兼職模特兒，正職係喺一間公司做傳訊及公共關係經理，而且有玩開運動，所以佢除咗有樣有身材，仲好好體力同埋好識同人溝通，所以真係好適合做球證。𠵱家佢係意大利低組別聯賽執法嘅女球證，不過消息話，由於佢條件好好，所以意大利足總計劃捧紅佢，先安排佢去意乙做主裁判，之後循序漸進，再提升佢去吹意甲甚至國際賽，務求將佢打造成女版哥連拿。
德女球證曾被胸襲
以意甲家陣嘅叫座力，真係冇可能鬥贏英超、西甲或德甲，但如果有個靚女球證孭重飛，肯定可以幫佢哋搶番啲曝光率。冇計啦，班男人唔掂，惟有靠女人搞番起意甲啦。話時話，女人喺歐洲頂級聯賽執法，雖然寥寥可數，但都唔係冇嘅，就好似麥絲咁，家陣就喺英超擔任旁證，而且仲表現得唔錯。另外，德國亦有女球證，曾經喺2012年倫奧執法嘅金髮靚女施汀侯絲，2010年負責吹哈化柏林對亞琛嘅德乙賽事，仲意外地俾哈化中場尼美亞鹹豬手㖭。