失落四年，高盛行政總裁布蘭克費恩（Lloyd Blankfein，圖）終於重奪華爾街最高薪CEO寶座！相反2012年嘅王者、富國銀行主席兼CEO施通普夫（John Stumpf）舊年人工就縮水16%，跌到落第三名。
華爾街幾間大行之中，只有摩根士丹利舵手戈爾曼嘅人工未全部披露，但佢前年人工只有980萬（美元．下同），相信舊年多極亦有個譜，布蘭克費恩應該坐定粒六，以2,300萬元（1.8億港元）稱王，亦係佢自金融海嘯以來最豐收嘅一年。
排第二係摩根大通CEO戴蒙，舊年袋2,000萬元，按年增加74%，係咁多位掌舵人之中增幅最勁嘅。富國嘅施通普夫就有1,930萬元，佢自2011年開始，底薪就冇調整過，今年就連現金連股份花紅都冇加。冇計啦，富國以消費銀行業務為主，近年因按揭減少而冇咁好景。