有望成為英超及英足盃雙料冠軍嘅阿仙奴，為免班主力俾人撬走，日前就同陣中一對中場艾朗藍斯（左）及辛迪卡索拉續約。喺去年「拆禮物日」因大腿受傷唞到𠵱家嘅藍斯，同兵工廠簽咗一張5年新合約，將會留效至2019年夏天，周薪仲加到90,000鎊（約115萬港元）；藍斯亦將佢同領隊雲格（右）嘅簽約相，放埋上社交網站㖭。至於辛迪卡索拉就續約1年至2017年夏天，周薪亦加到80,000鎊。另外，幾可肯定會喺今夏約滿離開阿仙奴嘅前鋒賓特拿，話自己回復自由身，唔使花新東家一毫子轉會，所以想搵間畀到佢104,000鎊周薪嘅球會。不過佢有外號叫「中堅賓」，相信唔會有球會咁儍仔啩。