新秀麗（1910）舊年業績靚仔，人氣韓劇《來自星星的你》男主角金秀賢舊年開始擔任代言人，應記一功。但原來金秀賢只係新秀麗嘅次選，公司呢次可謂無端端執到寶。
新秀麗揀代言人一向有眼光，上次搵來憑韓劇《善良的男人》人氣勁升嘅花美男宋仲基，新秀麗投資者關係總監虞瑋麟透露，由於宋仲基要服兵役，所以舊年第三季開始，公司要再物色代言人，當時《星星》仲未開拍，金秀賢爆紅屬意料之外，主席Tim Parker亦公開大讚金秀賢嘅代言效果好。
虞瑋麟形容，金秀賢嘅魅力真係好驚人，佢係劇入面孭過嗰個背囊喺南韓一早賣斷貨，希望可以靠佢開拓亞洲其他地區嘅年輕人市場。佢預計，公司今年嘅廣告開支增長唔低於10%，但產品就唔會因為咁加價，事關公司始終唔係行奢侈品路線。