何超儀（Josie）03年演過《豪情》，更憑戲中風情萬種的口技女王「趙啷啷」，成為電影金像獎最佳女配角，10年後再拍《3D豪情》延續趙啷啷角色。今趟她在片內演一名為與日籍男友一起，不惜遠渡重洋去到日本生活，她接受訪問時說：「都可以話係上集《豪情》嘅伸延，雖然冇講明不過你可以聯想趙啷啷埋街食井水，識咗個日本男仔跟佢返咗日本。」新角色最後被始亂終棄，要在日本重操故業因而認識到日本發展的杜汶澤。
一日食足5餐
為了角色超儀笑言引用了俄國戲劇大師史坦尼斯拉夫斯基提倡的方法演技，為代入角色而增肥15磅，她說：「我演嘅角色都算係潦倒，如果keep得太好會唔似，所以我同監製講要增肥至似。」所以在日本拍攝期間，Josie不單止一日吃足5餐，開工飯盒更是與別不同的有九格，比一般人多六格，她笑說：「嗰時撞正阿澤喼弗減肥日日唔係食蛋白就係烚雞肉，所以每次開餐佢都會走過來睇吓我個飯盒，然後講句『睇咗當食咗』就走開。」暴飲暴食令她在短短一星期內增肥15磅，由原先的百多磅變成接近120磅的日本風俗娘，除了增肥她還為角色加入了不少神髓，例如有日本口音的廣東話，煙不離手而打扮更停留在90年代般的浮誇。
在拍完《3D豪情》後Josie挺着大肚腩回港，第一件事就是減肥，在極速下回復拍攝前身形，現只有一百零幾磅，還找了女攝影師Mia Haggi拍攝性感照紀念，她說：「女仔個個都想靚靚見人，而且我係減肥公司代言人，所以唔肥得太耐。」
撰文：李森