自詡「白宮發言人」嘅新聞統籌專員馮煒光，早前以署名「金鐘仁」撰文向自由黨田北俊開拖，最終被田少踢爆「金鐘仁」咪就係月薪18萬嘅白宮發言人囉。但金鐘仁識得幫自己化名，竟然唔識傳媒筆名，成為傳媒茶餘飯後嘅取笑對象。
近日唔少傳媒、官員、議員嘅飯局上，都討論金鐘仁呢粒耀眼新星。最新一個有關佢嘅笑話，噴飯效果不亞於金句「三個字，不予置評」。原來馮煒光早前與唔同傳媒代表開飯時，以化名金鐘仁周圍開拖嘅佢，以天真爛漫面容向《文匯報》記者請教：公司係咪有個人叫做「鄭治祖」？
以為「鄭治祖」係真名
據聞《文匯報》記者忍住唔笑，惟有以「遲吓話你知」呢類答案回應。查實幾乎成個傳媒同政界都知，「鄭治祖」係《文匯報》政治組記者嘅化名，根本冇其人；而做得該報嘅政治組記者，寫新聞時好多時都唔用真名，只用「政治組」諧音相近嘅「鄭治祖」筆名代替。呢個筆名2005年開始用到𠵱家，估唔到喺政界同公關界打滾多年嘅馮煒光，竟然唔識鄭氏係何許人囉。
至於田少，當然咬住金鐘仁唔放，噚日要求政府交代馮煒光點解要用筆名喺報章寫文，政務司司長林鄭月娥書面回覆立法會時，冇講係咪真有其事，只係話政治委任官員平日公開寫文，都係用官職身份，總之冇相關資料提供。金鐘仁呢單𤓓事連累林鄭又要幫拖，查實佢知唔知乜嘢叫醒少少當幫忙？
mailto:[email protected]