廖創興家族後人廖偉芬（Jennifer）近年搞咖啡連鎖店，搞到有聲有色，佢媽媽廖湯慧靄就出名精於投資物業、商舖，最近兩人就一齊買物業，各自用自己個名，一人買一個跑馬地雲暉大廈嘅單位，合共花費9,350萬元。
土地註冊處資料顯示，跑馬地雲暉大廈B座21樓1室，買家係廖湯慧靄，成交價4,710萬元。喺正呢個單位對面嘅2號室，買家就係Jennifer，成交價4,640萬元。
呢幢大廈，一梯兩伙，換言之，B座21樓全層都屬於佢哋兩母女。兩個單位打對面，中間隔住個升降機大堂，既可互相關照，又有私隱。
南豐旗下跑馬地雲暉大廈不受一手條例規管，市場流傳消息特別多，今年重推以來，傳出唔少名人買家，包括華置（127）前主席劉鑾雄女友陳凱韻（甘比）、張智霖、張衛健等等，不過都要等土地註冊處資料更新，先知誰是真正買家。