【鴨脷洲】啱啱簽咗Neway唱片兼被指踢走鄭融做一姐嘅雨僑，大前日一身明星look到鴨脷洲嘅香港駕駛學院學揸私家車，咁又係，多咗嘢做自己揸車出入點都方便啲。大前日下晝約1點，雨僑戴住冷帽黑超同埋着乾濕褸，一個人坐的士到達駕駛學院，跟住助手同一位女性朋友都相繼到達，不過佢哋唔係一齊學車，其實只係得雨僑一個學，唔知佢係咪搵人嚟壯膽？
戴晒帽又戴黑超嘅雨僑，企喺度等師傅嚟嘅時候，吸引咗啲男學員眼望望，不過佢都氣定神閒冇理。師傅到喇，雨僑上好車先學上斜停車開車，見佢問題唔大。跟住就再去學泊位，師傅不時喺旁邊提點，見雨僑泊車都算唔錯，冇出界冇踩線算合格，跟住再學埋調頭，估唔到雨僑都幾熟手，揸車技術算幾好。
實戰冇難度
之後雨僑由師傅陪同下揸咗架車出去街度實習，見佢停車開車，對街上嘅一般路面情況都應付得到，表現淡定算相當OK。
雨僑揸咗半個鐘左右就駛番駕駛學院，大功告成，如果佢一路keep住咁嘅水準，再加以練習，相信如無意外雨僑都可以合格，成為有車牌人士。
採訪、攝影：朱志聰、潘冠恩