曾經被揭揸波子cut雙白線嘅民建聯陳克勤，最近口味有變，唔揸跑車揸電動車喎。原來佢獲中電贊助，試揸首代三菱電動車，以便親身體驗之後，可以向政府提出改善鼓勵市民揸電動車嘅建議。
雖然陳克勤揸慣波子，但佢試揸咗三個星期電動車後，都大讚身價唔及波子嘅電動車上落斜夠力，電池續航力亦唔係大家所想咁差，總之「安全、舒適、可靠」，當然啲充電站、充電設施就有改善空間。
佢亦發現架車太靜，有時要好小心街上嘅低頭族，免得啲途人唔察覺有車靠近。陳克勤嚟緊仲會試揸另一款日產嘅環保車。唔知試揸完，有冇諗過長遠都由揸波子變揸電動車呢？