有冇發現，喺政改討論咁熾熱、人人追住問泛民去唔去上海見京官之際，唔見咗公民黨黨魁梁家傑嘅蹤影？查實袋巾只不過係飛咗去倫敦探佢囡囡Jennifer，因為佢呢位寶貝女，雖然獲得名校牛津大學取錄讀法律，但有修讀戲劇嘅佢，早前試鏡成功，獲選參演世界巡演莎翁名劇《哈姆雷特》。
趁住就嚟開騷，身為廿四孝老竇嘅袋巾早前特登飛去英國打氣，順道同囡囡慶祝生日。袋巾除咗行倫敦花市，親自買靚花冧阿囡，仲非常有心思咁，以一本1902年紐約Roycroft版嘅《哈姆雷特─王子復仇記》做生日禮物，相信Jennifer一定冧到痹。