政府搵交嗌，令香港大嘈吵之事，為首嘅當然係拒絕發出免費電視牌照俾王維基嘅香港電視。前朝既選定三間公司入圍，今屆政府只要發出三個免費電視牌照，就可皆大歡喜，耳根清淨，偏偏梁政府就要三揀二，係要淘汰一間，結果就係踢走最有誠意、最有準備大搞電視節目嗰間（香港電視），發牌俾兩間唔嗲唔吊，漫不經心嗰兩間，咁樣明眼人都知係乜嘢事啦，分明因為一啲公眾不知道嘅理由，故意封殺王維基啦，咁樣公眾有乜理由唔同政府嘈吵過？假如攞到牌嗰兩間，一年內都唔啟播，梁振英會同行政會議點樣砌詞狡辯，都難向市民交代。
王維基發揮企業家之創新及不認輸精神，買咗一間擁有一個流動電視牌照嘅中移動子公司，預備今年七月一日啟播，宣布時通訊局唔出聲，今個月就以違反廣播條例為理由，制止王維基，令香港電視走上絕路。政府跟住放風，唱衰王維基「博大霧」，話佢形同攞咗流動小販牌照經營私房菜，又拒絕申領食肆牌或遵守消防條例，咁講法，直情好似同王維基有仇，誓要打殘一個創意企業家為止，唔怪得做過「工商及科技局局長」嘅王永平都在佢嘅am730專欄慨嘆：「政府今天處處窒礙創新的思維，還成立甚麼創新科技局？」又講得幾好噃，泛民議員他日如支持成立創新科技局，浪費納稅人金錢，可算係「腦殘」。
究竟流動小販牌照易唔易攞？梗係冇啦，1972年以後，港英政府已停發流動小販牌，特區政府亦然，今天街上好多流動小販（如灣仔地鐵站至移民局大樓之行人天橋）出沒，相信係無牌小販，食環署視若無睹唔敢執法。經營私房菜呢？邊度有間私人住宅設置私房菜，會合乎消防條例㗎？有幾多間會攞到食肆牌？食環署咪又係視若無睹？通訊辦高官嘅說話，簡直不倫不類。當今政府處處講中港融合，與內地盡量接軌，但通訊辦俾王維基嘅技術意見竟然係叫佢與歐洲接軌，採用DVB-H制式，而不是同意佢與大陸接軌，使用中國採用嘅DTMB制式，係唔係有意與特區政府政策大方向搞對抗呢？政府左手打右手，內部都好嘈吵啦，點怪得社會議論多多呀！