陳慧琳(Kelly)的人生可以說是女士們的理想藍圖，歌影廣告從不間斷、懷孕後極速收身、四十有一但面上不留半點歲月痕迹……簡單列出二三事，足以令全港女士咬牙切齒。然而形象正面，就是對她恨不入骨，只怪上天從來不公平，單單眷顧她一人。
撰文及造型：鄧卓嶽
攝影：周樂恒
廣告天后的蹤影處處可見，零瑕疵形象讓人不禁聯想到《來自星星的你》巨型燈板上的千頌伊。有傳電影版找女角，網民高票選Kelly當《星星》女神，「這套劇未有時間看，如果有機會參與嘅話當然好，因為全智賢嘅角色有好多發揮，𠵱家好少電影由女性主導。」《星星》咁hit都唔睇，全為孩子着想。「以前都會追韓劇，不過夜晚唔想畀細路睇電視，所以冇時間追。」孩子大過天，Kelly揚言現在最想：「做好媽媽呢份工。」
湊仔練耐性
高透明度零八卦，聊Kelly最重要的一盅兩件，蝦餃仔及小龍包，到底似她還是丈夫多些？「大仔似自己鍾意留喺屋企，但又學咗daddy嘅幽默，好鍾意同人講笑，如果可以似daddy outgoing多啲就最好。細仔呢方面就唔錯，唔怕陌生。」重心轉移家庭上，但Kelly表示不可不工作。「希望家庭事業都能兼顧，好似今日等佢哋番晒學、瞓晒覺，咪可以嚟影相，做完差不多又番屋企同佢哋玩。」
自當媽媽後，Kelly性情大變，「耐性好咗！本身好心急，但係帶住小朋友，你冇得急。好似教綁鞋帶，你幫佢綁，咁佢永遠都會唔識。」工作上出名力求完美，湊仔時豈非緊張大師？「管教上唔算嚴，唔會鬧佢哋，要同佢哋講道理，令佢哋知道錯喺邊。讀書方面自己又唔叻，所以唔想俾太大壓力，唔使包尾得㗎喇。」有冇偏心先？「唔會，兩個都一樣。一個要聽故事，第二個自然會走埋嚟，時間平均分畀佢哋，當然會教哥哥要照顧細佬。」
開工當甩身
最近忙着宣傳新戲《盜馬記》，上年開拍時要遠赴歐洲一個月，與孩子分隔兩地，「好唔捨得，擔心屋企冇我搞唔掂。後來知道佢哋冇問題，至放心投入拍攝。感覺好似回復單身，因為拍完戲放工就行街，享受嗰邊嘅shopping、美食。」今次再與梁家輝及鄭伊健合作，Kelly自言組合新鮮好玩。「最難忘家輝哥扮女人，對腳又幼又靚。」為新戲搏命，Kelly專程練攀石，還差點發生意外，「有場攀石戲條繩唔小心鬆咗，跌咗落地，好彩冇撞傷。」
人生道路一帆風順，就算遇到低潮，Kelly從不回頭多想，「我覺得盡咗力就夠。自小性格似爸爸比較樂觀，唔會諗控制唔到嘅事，最重要懂得知足。如果真係解決唔到，一定會先搵鍾珍。」與經理人情同母女的關係，一句「多謝鍾珍」意義重大。
化妝：Vivian
髮型：George Shum of ALCHEMY
場地：Carlson Suite, The Ritz-Carlton Hong Kong
更多精采時尚內容，盡在 http://add.appledaily.com。