近期靚嘅業績股唔算好多，不過隻新秀麗（1910）又幾標青，盈利增長18.6%，當中亞洲地區銷售按年增長15.6%，加埋一早落訂「低吸」金秀賢做代言，連早前德銀都話「星星」概念夠撐起隻股。以公司現時知名度，前景可繼續睇好，不過股價就算上到去24蚊都有大阻力，水位唔多。
反觀另一隻績優股吉利（175），可能大定會炒得開心啲。去年全年盈利26.63億元人民幣，按年多賺30.5%，國內銷量更達到13%增長，表現真係算唔錯。
不過對菲菲來講，份業績幾靚都好，都唔及管理層於記者會上講嘅一句。CEO話母公司吉利集團，不排除未來會獲母公司注入，後者最新收購嘅英國電動車公司Emerald Automotive資產。呢間Emerald雖然只係一間startup，但已造咗架電動van原型車，未來將設廠；另外吉利又話未來或會與Volvo合作發展電動車市場，所以吉利真係加快踩入電動車市場。
呢期電動車熱炒，吉利根基靚，又有新概念，可支持隻股谷底反彈。吉利過去跌得多，沽空亦多，去年10月至今年3月期間，該股沽空比率經常有雙位數，更有幾次高達三成幾，現時隻股炒高咗，挾淡倉上演機會大，不妨睇位上車。
Fifi
本欄逢周二、四刊出