你問10個講波佬「你最鍾意邊支球隊？」可能有7個會答你「無喎！」我哋唔係扮中立，只係當睇波變成工作，每季睇逾百場比賽，精采的悶蛋的全部生吞活剝，確會令人變得麻木。就像日前看着曼聯被死敵利物浦狂炒3蛋，我竟然變得沒有感覺了。其實有時也頗懷念年少時睇波的「熱血」感覺。
做得講波佬，入行之初怎會不是對足球充滿熱情？曼聯贏得3冠王那年，行步路都會心微笑，維持幾個月！到阿仙奴不敗封王那年，食食吓飯都會無啦啦皺眉「唉！」長嘆一聲。心情隨愛隊排名波動。可是現在的我，踢波着得最多係阿仙奴波衫；竟可掛着別人送的曼城頸巾；甚至暗暗慶幸紅軍擊敗曼聯，令爭標形勢更緊湊！淪落至敵我不分，可悲！其實不只自己，連身邊不是講波佬的球迷也有這份感覺。可能人大了，心情要隨股價樓價波動，愛隊排名？已經唔得閒留意。
不過，10個講波佬中總有兩、三位仍可保持昨日的熱血。其實有點羨慕他們，因為你會發現，如果愛隊低迷不感失落，反過來說，愛隊贏波時的興奮其實同樣消聲匿迹。如果你睇咗40年波仍然像費Sir一樣，望見曼聯贏波會笑到塊面紅卜卜，見其輸波仍會口黑面黑暴跳如雷，恭喜你！赤子之心，大概就是這意思。
方柏翹
now足球評述員