喺官邸搞完晚宴後，政務司司長林鄭月娥噚日朝早搞咗首場政改早餐會，赴會議員抽籤決定座位。結果民主黨涂謹申同公民黨湯家驊「有幸」抽到靚籤，夾實中聯辦法律部部長劉新魁同林鄭，俾唔少人笑佢哋係政改新護法。白鴿黨仲玩埋前後夾擊，單仲偕打頭炮發言，阿涂守尾門，可惜逼唔到劉新魁爆料。
反而去請願嘅長毛，向劉新魁交請願信後，獲對方誠邀交換卡片。其後長毛向林鄭送黑箱道具，據知林鄭話，佢可以收亦可以唔收，但既然長毛表達咗意向，為免浪費不如唔收，結果長毛最終攞走繼續循環再用。
表明中途離席嘅新民主同盟范國威，似乎想聽埋劉新魁回應，所以坐咗成個鐘，最終等唔切早過其他人少少鬆人。而早餐會玩中西合璧，點心同煙肉自助餐任揀，係林鄭官邸家廚出品。