內地唔少科網公司鍾意整隻吉祥物，令消費者容易記起佢哋，最深入民心當然係騰訊（700）隻「QQ企鵝」，阿里巴巴旗下淘寶都有隻「淘公仔」，新浪就有「小浪」，小米原來都有隻「米兔」，驟眼睇有幾分似早幾年好興嘅賤兔。要幫佢哋「論資排輩」，即係以公司成立日期去計，發現最「老」嘅係16歲嘅「QQ企鵝」，雖然佢同「小浪」都係1998年11月「出世」，但就早18日誕生；排第三嘅係10歲、金牛座嘅「淘公仔」，最年輕嘅，係仲有唔夠一個月就滿4歲嘅「米兔」。
