有「中國蘋果」之稱嘅小米噚日派出國際部副總裁Hugo Barra來港，喺一班靚女model陪同下出席活動，呢位Google前高層就係傳聞中被舊老闆撬長腳，為治情傷，由美國老遠走來中國為小米效力嘅嗰位仁兄。雖然佢話仲未有女友，但佢真人咁靚仔，唔怕搵唔到女友啦。
Hugo入鄉隨俗，來到中國返工都要改番個中文名，佢個中文名認真有氣勢，又易記，叫做「虎哥」。呢個名係小米老闆雷軍搵網民幫佢改，雷軍舊年喺微博呼籲網民幫Hugo諗中文名，然後投票選出「虎哥」。雖然呢個名似花名多啲，但Hugo話明白當中含意，有威猛意思，都好鍾意咁話。
巴西籍嘅Hugo除咗靚仔，仲相當健談。噚日佢交代小米手機高性價比之謎，劈頭就話小米冇秘密，手機可以賣到咁平，其實只係一個「慳」字。喺市場推廣方面，小米只係集中做社交網絡嘅廣告，唔喺傳統媒體落廣告，加上各方面嚴控成本，咁就可以將產品賣得咁平。
讚馬雲nice兼有詩意
小米夠膽只喺社交網絡賣廣告，Hugo就話要多謝阿里巴巴創辦人馬雲，因馬雲搞旺咗中國電子商貿市場，令大家習慣網購。佢形容馬雲係「short guy with big smile」，份人好nice，又有詩意。
至於佢老闆雷軍，佢當然擦些少鞋，指對方畀好大自由度下屬，為人夠創新、大膽，激發到公司嘅工程師好勤力，搞到佢𠵱家工作忙過喺矽谷嗰陣。
佢今次來港其實係宣傳，小米跟和電（215）旗下3香港合作推出「小米3」。
李華華
mailto:[email protected]