港澳辦主任王光亞在人大政協兩會期間，講過希望港人不要嘈喧巴閉，少啲爭吵。
孟子曰：「予豈好辯哉，予不得已也。」今日香港之爭吵，固然因為言論自由，百家爭鳴，各自在傳媒表達不同意見，是故眾說紛紜，令慣咗住在一言堂內嘅中央官員覺得香港人好嘈吵。此外，梁振英做特首之後，政府官員唔知點解，每每有「雷人雷語」（大陸名詞），語不驚人死不休（例如，地鐵好逼，咪等下一班車囉），當然刺激民眾反擊高官。這或與梁先生性好辯，死都唔肯認衰有關。上有好者，下必有甚焉，中央政策組首席顧問邵善波以鍾意鬧人著名，聽講中策組內之昔日上司、下屬、客人、客席顧問，同樣俾佢鬧過，消息人士話，有一次連大陸客人到訪討論，講講吓都俾邵先生鬧！
既然政府要採取戰鬥格，香港嘈吵就無可避免。最近例子就有（一）曾偉雄講襲擊劉進圖案未有直接證據證明與新聞工作有關，於是引起劉進圖家人與記者強烈不滿，向警務處長反擊。曾先生搵交嗌，所為何來？其實如果識講：「未有證據顯示到襲擊動機，有待深入調查，正式起訴時自有分曉。」咁就唔會惹來不滿啦。（二）發展局長陳茂波較早前指責港鐵推地不力，五次招標流標，言下之意係怪責港鐵連累政府在土地供應上，不能達到預定目標。好嘞，到咗三月十四日，在白石角政府地皮招標流標之後，陳局長又講到土地係公眾寶貴資產，政府不會賤賣土地。大佬，你講晒啦，想唔同佢拗頸都唔得。港鐵係上市公司，政府雖佔大股，董事會內嘅獨立非執董如鄭海泉、馬時亨皆是著名銀行家，識計數，要保護小股東利益，點肯賤讓港鐵土地？收唔到目標價，咪流標了事囉，陳局長做乜作晒狀去批評港鐵？依家你又唔係一樣？政府用三辣招壓抑需求，意圖㩒低樓價，但自己就點都唔肯接受地產商以較低價錢買地，仲唔係實行緊高地價政策？李克強在記者招待會講房地產供應有金句：「我認為幹一寸勝過講一尺」；特區之首梁振英係測量師，喺房地產方面，佢與官員往往講一尺做一寸。