因為要跳入梁班子做白宮發言人，馮煒光辭咗南區海怡西嘅區議會議席，政府安排嘅補選會喺嚟緊嘅周日（23日）舉行。代表民主黨出戰、又有多個泛民支持嘅單仲偕作最後衝刺，近日頻頻落區拉票，希望重奪原本屬於白鴿黨嘅議席，喺南區區議會為泛民搶多席。
前晚佢如常去到海怡西拉票，點知離開時竟然大吉利是被撞。話說佢揸私家車去到一個安全島時，停車畀市民過馬路，點知尾隨嘅新巴煞唔切掣撞埋去，結果佢架車後面撞到凹晒、成塊擋風玻璃亦碎灑滿地，好彩佢個人安然無恙好平安。唔知呢次撞車，對佢選情有冇預示？佢對手人力袁彌明同新民黨陳家珮又點睇？