有黑哨？雖然廣州恒大（FC廣州）喺周二亞冠盃第3輪分組賽，主場贏韓職全北汽車3:1，但全北有球波明明入咗，球證竟然吹無效；點都好，目前廣州3戰7分，暫排G組榜首。
廣州賽前嘅宣傳海報夠晒爆，大大隻字寫住「郁佢」，驟眼睇仲以為《古惑仔》又拍第N集，仲有靚靚啦啦隊打氣（圖）。廣州嘅郜林開賽無耐就梅開二度，李東國完半場前幫客隊追番1:2。怪事喺下半場出現，59分鐘，廣州張琳芃同門將曾誠誤會，全北球員趁亂頂入，但球證就吹咗全北犯規，睇番慢鏡真係完全唔覺有犯規。大難不死嘅廣州轉個頭由廖力生奠勝，最終贏3:1。
另外，同組嘅橫濱水手就慘喇，亞冠3場分組賽都贏唔到，作客0:1輸畀墨爾本勝利；日聯另一隊大阪櫻花，主場4:0大勝武里南聯，今季加盟嘅科蘭終於開齋，射入錦上添花嘅第4球。