體壇拾趣：山地興娶女主播好sweet

體壇拾趣：
山地興娶女主播好sweet

香港單車界又有喜事喇！今次係32歲嘅2010年廣州亞運金牌猛將陳振興，噚日迎娶亞視體育新聞主播梁倩影。呢件車壇大事，連退役嘅大師兄黃金寶都要出山，喺朝早接新娘時大跳「忘情釋迦舞」，幫師弟抱得美人歸！

甜蜜一吻
陳振興（右）及梁倩影。

阿寶跳忘情釋迦舞

噚日係「山地興」同女主播倩影嘅大日子，兄弟團星光熠熠，有大師兄黃金寶，亦有前東亞運金牌得主鄧宏業；而嗰邊姊妹團更加有「牛下女車神」李慧詩坐鎮。朝早為咗接新娘，阿寶由粉嶺踩車到元朗，仲同山地興大跳忘情釋迦舞，不過Sarah笑住話見有大師兄喺度，都唔敢玩得太盡。最後山地興畀咗2,888蚊開門利是，終於接到靚靚新娘子喇！

山地興（白衫）以禮服單車look大跳忘情釋迦舞，成功抱得美人歸。

至於喺夜晚婚禮度，除咗見到單車隊總教練沈金康，「桌球天后」吳安儀、「黑妹」葉姵延都有出席，新娘子仲喺宣誓時感動到眼濕濕㖭！山地興就話暫時未有時間度蜜月，不過𠵱家有家庭作後盾，對於9月仁川亞運爭取佳績，信心大咗唔少呢！

單車icon黃金寶（右）和李慧詩（左），分別擔任兄弟和姊妹。