PIMCO前聯席行政總裁埃利安周一開咗個Twitter賬戶，唔使24粒鐘就有超過1.3萬用戶追隨，認真多粉絲。可惜埃利安講明冇料爆，唔會透露佢同債王格羅斯嘅決裂內幕，只係想分享投資心得。
其實好多財經名人有Twitter賬戶，令人印象深刻嘅，當然係激進投資者伊坎舊年8月發咗兩條訊息，話自己掃咗大量蘋果，令蘋果市值單日增加120億美金；股神畢菲特舊年亦開咗個賬戶，至今有78.5萬人關注，但佢只發過五條普通訊息。
埃利安一晚已發咗八條訊息，自嘲經常串錯字，希望大家唔好介意；又話之前都有睇別人嘅Twitter訊息，主要睇新消息，𠵱家係時候要貢獻番轉頭。
PIMCO都有一個Twitter賬戶，多數係債王用嘅，之前呢個賬戶張相係債王與埃利安嘅合照，兩位鬧翻後，張相就換成公司logo。