【記者蔡元貴報道】廉政公署前專員湯顯明涉嫌違規酬酢及送禮醜聞，嚴重打擊這個40年反貪部隊的形象。過去10年多次替廉署拍攝電視劇的金像導演林超賢也慨嘆，公眾信心「突然間跌得好緊要」。即將揭幕的新一屆香港國際電影節裏，會放映一系列廉政電視劇，林超賢透過其擔任顧問導演的《明日》，宣示對廉署重新出發的期望。
「我諗近呢年大家都知道，廉署都面對自己好大嘅關口，不停俾人哋去狙擊，令好多人對廉署……摧毀咗啲內心一路積聚嘅嘢。」林超賢於2004年至今，已替廉署拍攝過五部電視劇。因應廉署成立40周年，他今年與導演黃修平合作，完成了一部名叫《明日》的新劇。
《明日》講述奶粉水貨客
《明日》這劇名，是林超賢對廉署的期望。他說自己感受到香港貪污情況近年最大變化的是「層次唔同咗」，「𠵱家去到個層面，已經係你想像唔到，原來呢個（人）都貪污。所以你先至擔心越來越……即係咁，你冇諗過喺呢個範疇裏面嘅人都會發生一件咁嘅事，突然間變得好緊要。」
由廖啟智主演的《明日》講述2011年一宗涉及奶粉的真實個案。有連鎖超市及藥房職員收受賄水貨客的「利是」，私下超額售賣奶粉，結果職員被判監緩刑及罰款，水貨客則入獄。林超賢說，本劇側重描寫調查員，期望從中帶出重新出發的訊息：「我哋仲要唔要信任廉署？絕對需要。咁喺呢個時間裏面，要重新出發，我哋就係要期待有明日。」
廉署還會在電影節期間，把昔日的精選劇集重新剪輯，搬上大銀幕。不過大銀幕未必有電影感，林超賢說，為廉署拍劇，創作空間逐漸狹窄：「你會睇住個空間越來越細，佢哋有佢哋嘅顧慮，有啲嘢會保守咗。你睇番1970年嗰啲，直情拍到同警匪片冇分別，可以好大膽。」譬如《明日》中的調查員角色，他想加入一些感情元素，廉署卻不同意，「如果一個戲劇，流於案件上，咁不如大家睇番報紙都得喇，所以有時都會同佢哋喺呢啲位上周旋」。
《魔警》險過不了內地審查
除了廉政電影，林超賢執導新戲《魔警》亦獲選為閉幕電影，《魔警》啟發自前警員徐步高連環殺害同袍的案件，他認為此案的真相還沒有大白，而影片送審內地單位時，一度連戲名也過不了關。
「《魔警》一開始就需要上內地，所以去到有啲嘢都點到即止。」林超賢說，單是戲名，就要寫信交代：「的而且確我個戲名畀內地ban過，因為如果就咁用字面解說，佢好擔心你將警察塑造到唔知點，壞咗一啲社會形象，佢唔知你偏鋒到去乜嘢地步。收尾我哋就寫咗一封信，解釋清楚對呢個名嘅定義，佢就通過番我個名。」林強調《魔警》劇情與徐步高案無關，只是受案件啟發：「因為當日呢個案件，我覺得好似完得好倉卒，好多嘢大家都冇打開過就完咗。」電影不是要為徐步高平反，但劇終時卻帶出一個耐人尋味的訊息：「人心總有一點黑。」