【記者直擊】
長實（001）與市建局合作的深水埗丰滙不僅被舊樓包圍，記者直擊樓盤現場所見，更發現四大缺點，當中包括項目2座與隔籬嘉裕居黏到實，兩幢樓的睡房隨時伸手摸到對面窗。項目2座對出的醫局街，五金店、建築物料及回收店林立，儼如南亞裔水貨天堂。
記者：陳家雄
老街坊直言，丰滙周邊環境混雜，附近有美沙酮診所、西九龍走廊橋底更是露宿者棲身之所，故有錢都唔會買丰滙。
長實深水埗丰滙共3座，1及2座座落荔枝角道，3座位於醫局街，提供402伙。由深水埗港鐵站C出口抬頭抑望，已見項目鶴立舊樓群中。記者沿桂林街直行，穿過熱鬧市集，不消10分鐘便抵樓盤現場。圍繞樓盤的4個十字路口，屯駐各大行代理，見人就講：「丰滙三房，啱晒換樓！」美聯物業甚至在項目隔壁，租用地舖3個月，月租約3萬元，作為部署新盤的哨站，一隊隊代理考察團下午時份前後腳到場備戰。
現場所見，丰滙2座與樓高20層的嘉裕居勁貼，距離料少於十米，由單位伸手隨時可觸及對面睡房窗戶，相信丰滙該座低層戶睡房需長期落簾保私隱。翻查丰滙樓書，勁貼單位是丰滙2座A室與嘉裕居A室。
對出醫局街多回收店
嘉裕居租客龍先生與媽媽剛步出大門，龍生無奈稱：「𠵱家個廳暗晒！」龍媽媽指丰滙遮晒自己個客廳，感慨道：「嘈啦、塵啦……你話有無影響？梗係有啦，𠵱家遮住嗰邊就差啲……（伸隻手掂唔掂到隔籬樓？）咁就掂唔到，但隔籬單位可能掂到。」
記者沿醫局街觀察，五金舖、批發店、建築物料、電器回收店林立，路口總見一堆堆砂煲罌罉攤在地上出售。老街坊黃先生話：「我住喺佢（丰滙）斜對面，睇住佢起，個仔結婚，想買樓，但呢度就唔買啦！我住咗幾十年，慣咗呢區，呢度好多巴基斯坦人，佢哋在街邊收賣電器。」一名南亞裔青年見到記者，即以流利廣東話說：「好多同鄉都會喺呢度買嘢，買啲舊電器。」