𠵱家啲人玩LINE、WhatsApp，仲有冇人貼郵票寄信？過多一、兩代，仲有冇人知集郵係乜嘢嚟呢？
喺亞洲郵票拍賣市場有領導地位嘅蘇黎世亞洲（Zurich Asia）香港拍賣會，喺剛過去嘅星期日結束咗，兩日拍賣推出咗超過2,300件珍藏郵票，吸引咗唔少郵票收藏家去競投。全場最矚目嘅拍品，係1917年由蒙古科布多掛號寄去北京嘅紅色中條封，由一位中國買家以115萬港元投得。科布多郵局喺1913年開局，但喺1924年關閉。據紀錄，存世嘅同類科布多郵封僅存五封，相當珍貴。另一個焦點，係1897年慈禧小字改值洋銀2分錯體郵票，以69萬港元成交。