亨泰（197）環球採購多元化消費品採購網，以至物流瓣數，完善到痹，喺電貿消費嘅年代，呢批資產好值錢，但亨泰平過同行九條街，而且集團三線匯合，等爆邊。
亨泰除咗近幾年拓展嘅農務業，本身主打祖國快速消費品貿易，由包裝食品、護膚品，去到冷凍鏈產品，一應俱全。而集團喺行內發展超過25年，已經喺全球建立咗完善採購網。
電子消費大行其道，單係亨泰呢個背景，已經可以自組電貿網購，呢個隱藏價值，未反映。
又亨泰物流業，包括倉儲以至地區分銷跨境貨運車隊。呢期騰訊（700）及阿里巴巴兩位電貿大佬，就銳意向下游拓展物流業，亨泰物流瓣數，已經全副武裝齊全晒，呢批資產，值租到爆。
家陣物流業火熱，亨泰已經將位於中山物流中心，作部份升級。至於喺惠東物流中心發展項目，集團亦正係同一位可能為物流中心帶嚟業務嘅潛在夥伴討論合作。呢壇製作，一有消息出，亨泰有point炒。
賣點多炒味濃
又電貿大佬呢期掟啲零頭出嚟，買殼或縱橫向拓展，「醫、食、住、行」四大瓣數，仲未有掂到農務。只要其中一位大孖沙，一出手入股農務股，市場實搵同類股炒，亨泰再多個point。
亨泰淨現金挨近4億銀，現價0.17元仲低過2008金融海嘯價0.172元少少，PB得0.28倍。場內物流股，長安民生物流（1292）及伽瑪物流（8310）PB過1倍，華南城（1668）PB兩倍，濱海泰達物流（8348）PB低過1倍，但都講緊0.67倍。亨泰只係上到濱海呢個PB水位，講緊要升近1.4倍，到0.4元。
錢雋
細價股專家
本欄逢周二、五刊出