Twitter行政總裁科斯托洛（Dick Costolo，圖）噚日首度訪華，停留上海三日，會同內地政府官員，包括上海自貿區嘅代表等，同埋學術界會面，似乎想拓展內地市場咁喎。
Twitter發言人就話，科斯托洛只係想學吓中國文化，了解中國科技業界，唔係想游說中國官員畀Twitter進軍內地。
其實科斯托洛對Twitter進軍內地嘅態度，一直都冇facebook行政總裁朱克伯格咁進取；舊年科斯托洛接受訪問時先話，雖然好想喺中國發展，但唔會因為咁而犧牲Twitter嘅宗旨，要維護用戶嘅溝通方式。
不過就算Twitter唔能夠打入中國市場，Twitter已經喺內地賺緊錢。Twitter子公司MoPub，係將廣告置入App嘅公司，𠵱家喺內地都賺緊唔少App開發商錢，而聯想（992）亦有喺Twitter落廣告㗎。