擾攘多時，阿里巴巴終於決定美國上市。雖然香港失去千億大刁，但勝在堅持原則，贏了腰骨。另一邊廂，李小加發表輸家感言，睇完真係嬲嬲哋。
首先，佢話佢為香港堅持法治的傳統及原則而感到自豪。即係咁，由此至終，李小加嘅態度都係希望為阿里嘅「董事特權制」放行，甚至為此兩度撰文曲綫撐阿里。帶頭冇原則嘅係佢本人，試問佢有乜資格去為感到「自豪」？
咁都算，之後李小加反教訓香港人，話「不要在這事沾沾自喜、自我陶醉」，仲話唔會為阿里離去而放棄改革。呢個情況令我聯想起一個MK仔同人打交，點知打輸咗，於逃走前就同對方講：「你咪以為你好好打呀！係我今次讓你咋！」這的確係好「周星馳」的場口，但李小加呢兩句，無疑係「跌落地拿番揸沙」嘅完美演繹。
輸家除咗李小加外，仲有一眾諗住炒「阿里借殼」嘅文化中國（1060）小股東。聽講現時仲有唔少人堅持坐，第一批係大戶，本來都係掟啲散銀入去賺零用，眼見文化中國跌到咁樣衰，沽嚟都無謂；第二批就係小散戶，話隻股點都有馬雲照住，一定會升，但身家已唔見一截。如果隻嘢真係咁堅，騰訊（700）就唔會第一日就大手出貨，所以呢兩日已低撈嘅小散戶，分分鐘就係幫騰訊接貨。
Fifi
本欄逢周二、四刊出