唐牛愛股佳景（703）業績後見光死，埋單插水7.2%，但在估值便宜、前景秀麗及猛人入股三大因素下，大跌正提供低吸機會，中長線贏面大。
主打澳門餐飲及手信業務嘅佳景，去年全年賺2.6億銀，按年增長7.7%，毛利率持續攀升，最新升至72.5%，經過一輪回調後，現價市盈率僅9.6倍，比起同業翠華（1314），瘋狂折讓近八成，可謂平足一條街。再講前景，除原來喺澳門嘅餐飲業務外，集團將於橫琴島興建綜合大樓，當中包括100間食肆及食物手信店，銳意打造成主要旅遊景點，務求將澳門、橫琴及珠海遊客一網打盡。另一個增長引擎手信業務，預計下半年將可透過專櫃售賣，旗艦店亦正在裝修中，加上有樂壇校長譚詠麟做代言人，爆發力非同小可。
公司早前以先舊後新方式，配售6,540萬股，每股作價4.3元，成功集資約2.8億銀，擴軍銀彈已備。批股更吸引金手指謝清海認購，惠理基金持股由原來嘅3.28%增加至5.65%，有猛人做後盾已經穩陣，現價入市仲要比金手指平三毫子，成功贏在起跑線！
佳景噚日一度低見3.57元，收市則企穩4元，反映早前3.8元嘅橫行區支持力強，調整或已完成。一隻9倍PE嘅增長股，喺而家嘅波動市況中可謂絕無僅有，值得真金白銀支持。
唐牛