港股逐日陰乾，阿里不來，加上業績將至，科網龍頭騰訊（700）崩圍，文化中國（1060）、中信21（241）累積千層蟹貨，氣氛相當慘淡。眾多板塊中，只有水泥及光伏叫好啲；細價股又輪流洗倉，一街都係地雷，唔想炸中，最好就係唔出街，落街執平貨，真係炸死人無命賠。
財仔股逆市起錨，1月21日推介中國信貸（8207），剛好升咗一個開。最近與中原中國合作，進軍內地房貸市場，並斥375萬銀購網上房貸業務30%權益，短線相信仍有憧憬。低位有貨者不妨先套回成本，以「零成本」方式坐落去。
另外，去年轉做「二叔公」的華銀控股（628），橫行收貨近1年後，昨大成交爆上30%，完美突破1.05元橫行區頂部，目前市值僅5.6億元，短線調整後應仲有水位再上。
想穩中求勝，可考慮市傳分拆UA聯合財務的新鴻基公司（086）。消息指，公司擬委任摩根大通為聯席全球協調人，爭取下半年在港上市。趁市況尚可，分拆有助釋放業務價值，對新鴻基公司有利。去年中期業績顯示，私人財務收益增長23%至14.87億元，佔整體收入68%，稅前溢利6.26億元。
估值方面，新鴻基公司歷史PE唔夠10倍，息率4.6厘，目前PB唔夠1倍，可攻可守，加上分拆概念，短線應對股價有支持，目標先睇5.5元。
魏力
http://www.facebook.com/2012jason