恒生銀行（011）持股約一成嘅興業銀行，噚日為慶祝在港開第一間分行，喺金鐘一間五星級酒店舉行酒會，竟然請來接近700人出席，塞滿整個會場，包括CY在內嘅嘉賓上台祝酒時，台下好多人一齊舉起手機影相，唔知仲以為去咗紅館睇演唱會。其實呢類祝酒相又有乜好影呢，唔通大家要鬥快放上面書，證明獲得邀請？
嘉賓名單中，恒生一姐李慧敏、高層馮孝忠當然有到，仲有財庫局副局長劉怡翔、新上任創興銀行（1111）副主席嘅梁高美懿、滙豐銀行前大班鄭海泉。興業銀行香港分行行長胡麟話，在港開分行主要因為香港可以通向海外，不過就冇透露未來開分行嘅大計，暫時做好呢一間，先再考慮開多幾間。
黃賢創攝